مرة أخرى، النعمة ميارة، رئيس مجلس المستشارين، دار زبلة، وهاد المرة زبلة كبيرة وتبعاتها خايبة للمعاودة. ميارة، وفإطار الندوات الاحتفالية للي كينظمها في الغرفة الثانية ديال المستشارين، عرض على أكثر من 40 من رؤساء البرلمانات الإفريقية والعربية وحتا من أمريكا اللاثينية، باش يشاركو فندوة حول التعاون البرلماني جنوب-جنوب. فالجلسة الافتتاحية ديال هاد الندوة للي تعقدات فمقر الغرفة الثانية البارح الخميس، النعمة ميارة عطا الكلمة لممثل البرلمان فغينيا بيساو.
هاد الأخير طلع للمنصة وتكلم على أمور فيها ارتباط بالأوضاع الداخلية فبلادو للي كاتعيش أزمة سياسية ما بين رئيس الجمهورية أومارو سيسيكو إمبالو، والبرلمان للي كتهيمن عليه المعارضة برئاسة دومينغو بيرييرا.
النعمة ميارة ما عرفش بللي غينيا بيساو كتعيش وضعية سياسية صعيبة منذ أن قرر رئيس الجمهورية فبداية دجنبر الماضي حل البرلمان على خلفية ما اعتبره الرئيس محاولة انقلابية تتزعمها قوات الحرس الوطني بزعامة المعارضة المهيمنة فالبرلمان.
بعد ما يناهز أكثر من ساعة، عاد النعمة ميارة لقاعة المؤتمر فمجلس المستشارين وخدا الكلمة باش يحاول يصحح الزبلة ويوضح بلغة فرنسية ركيكة بللي كلمة ممثل برلمان غينيا بيساو غير مدرجة أصلا فهاد الندوة، وبأن المنظمين ماكيتدخلوش فالشؤون الداخلية لغينيا بيساو، وبللي هاد الخطأ ارتكباتو الإدارة. فنهاية الكلمة ديالو، طلب النعمة ميارة، للي بان عليه الارتباك والتخبط، من ممثل برلمان غينيا بيساو ينساحب من القاعة ويغادر المؤتمر ككل. هاد الشي وقع أيام فقط بعد زيارة وزير الشؤون الخارجية والتعاون الدولي والمجتمعات في غينيا بيساو، كارلوس بينتو بيريرا، للمغرب في بداية هاد الشهر، وللي أكد فيها أن بلادو تجدد دعمها لسيادة المغرب على كامل أراضيه.
الوزير بيريرا، في تصريح صحافي عقب مباحثاته مع وزير الشؤون الخارجية والتعاون الإفريقي والمغاربة المقيمين بالخارج، ناصر بوريطة، أكد أن “غينيا بيساو تعترف بسيادة المملكة على كامل أراضيها، وتلتزم ببذل كل ما في وسعها من أجل الاعتراف بهذا المعطى على الصعيد الدولي”. بعد التحريات للي قمنا بها البارح، تأكد لينا بلي رئيس مجلس المستشارين النعمة ميارة تلقا فعلا اتصال ينبهه لخطورة ما وقع وبللي هاد الأمر غادي تكون عندو تبعات على مواقف غينيا بيساو من العلاقات مع المغرب. فضائح النعمة ميارة، رئيس مجلس المستشارين، لا تنتهي.
فبعد الأزمة لي خلقها مع إسبانيا بسبب قضية سبتة ومليلية، وأزمة أخرى أثناء زيارة لباناما، وبعد الزيارة لي كان غادي يقوم بها لإسرائيل وكان غادي يتستقبل فيها بالطابيغوج والبروتوكول ديال رئيس دولة، وبعد العرس الخرافي والهدايا لي توزعات فيه ولي وصلات للعالمية وكانت غادية تخلق أزمة فمجلس حقوق الإنسان فالأمم المتحدة، هاهو كان غادي يخلق أزمة دبلوماسية خطيرة لبلادنا مع غينيا بيساو لي عندها مواقف جد إيجابية من قضية الصحراء المغربية.
النعمة ميارة لي حول مجلس المستشارين لقاعة حفلات كتسهلك ملايير فعز الأزمة ولى ثقيل ومكلف للحياة السياسية فلبلاد، وصبح إنهاء مهمتو كرئيس للغرفة الثانية في أكتوبر المقبل مسألة وقت فقط. السيد حرق جميع الأوراق ديالو بلا فايدة تدكر. هاد الشي ديال العلاقات الدولية والدبلوماسية خاص مجلس المستشارين يعطيها بالتيساع، راه كثرو زبايلهوم.
كود
